 |  |
чырвона-банэрная рэкляма:
Вызначыліся прэтэндэнты на галоўную Рок-Карону
| 26.02.2008 | У выніку галасаваньня шаснаццаці сяброў журы абсалютную большасьць галасоў набралі гурты Neuro Dubel і «Ляпіс Трубяцкой». Абедзьве каманды ўжо атрымлівалі галоўную айчынную рок-узнагароду - гурт Аляксандра Кульлінковіча быў узнагароджаны ў 1998 годзе, а каманда Сяргея Міхалка – на два гады раней. Імя Рок-Караля 2007 году будзе названае 29 лютага падчас урачыстай цырымоніі «Рок-Каранацыя» ў канцэртнай залі «Мінск». А. Кульлінковіч: «Ляпіс – выдатная каманда, але ці гралі яны летась у Беларусі?»
Адзін з галоўных прэтэндэнтаў на Рок-Карону – гурт «Ляпіс Трубяцкой» пагадзіўся выступіць на Рок-Каранацыі, але па хуткім часе вымушаны быў адмовіцца. «Хачу прынесьці за гэта выбачэньні, - кажа прадусар гурта Яўген Калмыкоў. – Ня варта ў гэтым шукаць нейкі падтэкст, проста так склаліся абставіны».Абедзьве каманды разьлічваюць на перамогу ў Рок-Каранацыі-2007. Лідэр Neuro Dubel Аляксандар Кульлінковіч кажа, што нягледзячы на забароны ў 2007 годзе, яго каманда працавала вельмі актыўна: «Мы запісалі альбом, рыхтуем трыб'ют, далі нямала канцэртаў, таму маем права разьлічваць на галоўную рок-узнагароду».
Яўген Калмыкоў кажа, што ў яго зьмешаныя адчуваньні: «Праблема тут і ў самой Рок-Каранацыі, і ў агульным стане беларускай рок-музыкі. Але ж факт намінаваньня, вядома ж, прыемны». Пры гэтым прадусар ТА «Дзеці Сонца» дадае: «Усё ж Карону колісь мы атрымлівалі, крыху няёмка будзе атрымаць яе ізноў».
Атрымлівалі ўзнагароду і Neuro Dubel. Аднак гэты факт музыкаў не бянтэжыць. Што да канкурэнтаў, то Аляксандар Кульлінковіч зазначыў: «Вельмі люблю творчасьць „Ляпісаў“, але ці гралі яны летась у Беларусі?»
Дагэтуль толькі адна беларуская каманда двойчы была ўзнагароджаная галоўнай Рок-Каронай – гэта N.R.M.
Варта зазначыць, што Neuro Dubel і «Ляпіс Трубяцкой» таксама ў ліку прэтэндэнтаў на перамогу яшчэ ў некалькіх намінацыях – «Альбом», «Песьня» і «Кліп», а іх лідэры ўдзельнічалі ў афіцыйным галасаваньні на ТГ за «Выканаўцу году».
SB, ТГ
угару - up
|
|
|
© Менск 2003-2008 Тузін Гітоў 
Пры выкарыстаньні тэкстаў абавязковая спасылка на "Тузін Гітоў" http://music.fromby.net. Выкарыстаньне файлаў магчымае толькі з папярэдняга дазволу рэдакцыі. 
|