 |  |
чырвона-банэрная рэкляма:
be2gether пашыраецца
| 23.04.2008 | Рок-фэст на беларуска-літоўскай мяжы be2gether адбудзецца ў другі раз. Гэтым разам ён пройдзе ажно на трох сцэнах. Арганізатары сёлета не выстаўляюць аніякіх палітычных лёзунгаў і прысьвячаюць фэст Вільні - be2gether уключаны ў сьпіс мерапрыемстваў праграмы «Вільня – культурная сталіцы Эўропы-2009». Праграмны дырэктар фэсту Давід Блюўштэйн: «Беларускіх гуртоў сёлета будзе яшчэ болей. Але выступяць яны не на галоўнай сцэне…»
Рок-фэст пройдзе ў тры дні – з 14 па 17 жніўня ў Нарвілішках, у некалькіх дзясятках мэтраў ад беларускай мяжы. Выступоўцы – гурты з усяго сьвету – будуць разьмеркаваныя па трох сцэнах пад адкрытым небам, плянуецца яшчэ і клюбная пляцоўка. Арганізатары пакуль не абвяшчаюць сьпіс хэдлайнэраў be2gether-2008. Праграмны дырэктар фэсту Давід Блюўштэйн кажа, што плянавалася запрасіць у Нарвілішкі гурт Metallica ды яшчэ колькі сусьветных зорак, але перамовы яшчэ ня скончаныя.- Так, я вёў перамовы з Metallica, хацелі іх бачыць на фэсьце, але ў іх тур сканчаецца за 10 дзён да пачатку нашай імпрэзы. У астатнім на 80% праграма ўжо складзена, але пакуль перамовы ня скончаныя з усімі, абвяшчаць хэдлайнэраў ня будзем.
Сярод удзельнікаў буйнога эўрапейскага фэсту па традыцыі ўжо будуць і беларусы. Летась у be2gether-2007 узялі ўдзел гурты «Ляпіс Трубяцкой», Drum Ecstasy і IQ48. Давід Блюўштэйн кажа, што сёлета іх будзе болей. Праўда, на галоўнай сцэне наўрад ці нехта зь іх выступіць.
- Магу сказаць, якія беларускія дыскі стаяць на маім стале – Зьміцер Вайцюшкевіч, «Крамбамбуля», «Серебряная свадьба», beZ bileta. Відаць што беларускія гурты будуць выступаць на трэцяй сцэне. У Беларусі тая ж праблема, што і ў літоўцаў – няма гуртоў, годных першай сцэны, на якой будуць выступаць вядомыя заходнія каманды.
Адзін з арганізатараў фэстывалю Антон Нікіцін дадае, што сёлета будзе выяўлены яшчэ больш клопат пра гледачоў – нават адмысловы дзіцячы садок будзе працаваць, у якім бацькі змогуць пакінуць сваіх дзетак. А мастакі дык наогул могуць прыяжджаць у Нарвілішкі за 10 дзён да фэсту.
- Для ўсіх цікаўных творцаў будуць зладжаныя творчыя майстэрні. Ужо на пачатку жніўня можна прыязджаць у Нарвілішкі ды паспрабаваць сябе ў розных відах мастацтва, а паказаць свае працы будзе магчымасьць на самім фэстывалі.
Пакуль што квіткі be2gether можна атрымаць, як бонус да DVD-фільму пра леташні фэстываль коштам 100 літаў (ля 45 даляраў). Адмыслова для беларускіх гледачоў плянуецца зрабіць пэўныя зьніжкі. Разлік арганізатараў фэсту – на 15 000 чалавек.
Сайт фэстывалю - www.b2g.lt
Сяргей Будкін, ТГ, для www.racyja.com
Фота: www.b2g.lt
угару - up
|
|
|
© Менск 2003-2008 Тузін Гітоў 
Пры выкарыстаньні тэкстаў абавязковая спасылка на "Тузін Гітоў" http://music.fromby.net. Выкарыстаньне файлаў магчымае толькі з папярэдняга дазволу рэдакцыі. 
|