 |  |
чырвона-банэрная рэкляма:
Львоў як месца паломніцтва прыхільнікаў беларускага року
| 16.07.2008 | Удзельнікі фэсту Be Free пра задуму сабраць 26 гуртоў зь Беларусі, Украіны, Польшчы і Францыі ва ўкраінскім Львове. З. Вайцюшкевіч: «Гэта адзін з маіх улюбёных гарадоў!» А. Кульлінковіч: «Добра, што зьявілася альтэрнатыва „Басовішчу“». Partyzone: «Гэта выдатная магчымасьць адчуць, што ты свабодны!» Поўная праграма фэсту, што пройдзе 9-10 жніўня – на ТГ.
Вызначылася папярэдняя праграма міжнароднага фэстывалю Be Free, што пройдзе ў Львове 9 і 10 жніўня. У фэсьце прымуць удзел 26 гуртоў зь Беларусі, Украіны, Польшчы і Францыі. Для гледачоў ўсе канцэрты будуць бясплатнымі. Для начлегу публікі ўлады Львова выдзяляюць месца пад намётавы гарадок.Праграма фэсту складзеная на 90 працэнтаў, але ў яе яшчэ змогуць трапіць тры маладыя беларускія гурты – пераможцы адмысловага інтэрнэт-конкурсу на старонцы www.euroradio.fm. Да 30 ліпеня гурты могуць дасылаць свае кампазыцыі на інтэрнэт-галасаваньне, пасьля якога зь дзясяткі фіналістаў аргкамітэт конкурсу абярэ тройку найбольш вартых выступоўцаў. А дзесяць фанаў добрай музыкі праз адмысловыя конкурсы атрымаюць бясплатную вандроўку на Be Free. Дарэчы, праз конкурс на фэст адбіраюцца ня толькі беларускія выканаўцы. Нагадаем, што 10 жніўня ў Львове выступяць пераможцы конкурсу польскага фэсту Rocko-Go – гурт Metanoia з горада Жывец.
Арганізатары кажуць, што Львоў выбраны месцам фэсту невыпадкова: у гэты вядомы сваёй культурнай спадчынай і шматлікімі фэстывалямі горад штогод прыязджаюць турысты як з самой Украіны, так і з суседніх Беларусі і Польшчы, а таксама зь іншых краін Эўропы. Публіцы з-за мяжы важна тое, што для вандроўкі ва Ўкраіну не патрэбная віза, а дабрацца да Львову па кішэні нават студэнту-бюджэтніку.
Ухваляюць выбар гораду і беларускія музыкі. Зьміцер Вайцюшкевіч кажа, што гэта адзін зь яго самых улюбёных украінскіх гарадоў: «Думаю, што з гэтай задумы атрымаецца вельмі пазітыўная рэч».
У гурце «Джамбібум» шмат хто яшчэ ніколі ня быў у Львове, але даўно марыў наведаць гэты горад. Для «джамбібумаўцаў» Be Free - магчымасць ня толькі прадставіць сябе, але і паслухаць вялікую колькасьць добрай беларускай музыкі. Апроч таго ім вельмі хочацца паглядзець і паслухаць суседнія гурты.
Андрэй Плясанаў з гурта P.L.A.N. рыхтуе на Be Free новыя песьні, што ўвойдуць у шосты альбом «У пошуках страчанага». Гурт рыхтуе і акустычную, і рокавую праграму.
IQ48 таксама рыхтуе новую праграму, сярод прадстаўленых будзе прэзэнтацыя сьвежых песень, якія запісваюцца для новага альбома, выпуск якога запланаваны на восень.
Аляксандар Кульлінковіч, лідэр гурту Neuro Dubel, адзначае: «З аднаго боку, шкада, што фэст беларускай музыкі будзе адбывацца не ў Беларусі. Але добра, што зьявілася нейкая альтэрнатыва „Басовішчу“. Было б вельмі добра, каб у год праходзіла па 50 такіх фэстываляў, бо ўся добрая беларуская рок-музыка ня можа зьмясьціцца ў рамкі гэтых двух фэстаў».
А з пункту гледжаньня гурта Partyzone, адметнасьць Be Free – ужо ў самой назве фэсту. «Свабода для нас – гэта ўсё. Тут і асаблівых камэнтароў ня трэба. Будзь свабодным!!!» – заклікаюць музыкі і абяцаюць шмат новых цікавых песень.
Папярэдняя праграма Be Free
9 жніўня, субота
Рок-сцэна, Парк культуры імя Багдана Хмяльніцкага
14:00 – 24:00
Пачатак праграмы: выступы 3-х маладых гуртоў, пераможцаў конкурсу www.euroradio.fm (BY)
:B:N: (BY)
Partyzone (BY)
Iнкунабула (UA)
Pomidor/OFF (BY)
ROCKAWAY (PL)
Znich (BY)
zygimont VAZA (BY)
Vladivostok (FR)
Zet (BY)
Haydamaky (UA) і Voo Voo (PL) - супольны канцэрт у межах projekt Lublin
10 жніўня, нядзеля
Фольк-сцэна, Плошча Рынак
12:00 – 17:00
NHS (BY)
P.L.A.N. (BY)
Джамбібум (BY)
Яр (BY)
Стары Ольса (BY)
WZ-Orkiestra (BY)
LitvinTroll (BY) + Паказальны выступ рыцарскіх клюбаў (UA)
Рок-сцэна, Парк культуры імя Багдана Хмяльніцкага
16:00 – 24:00
Xy4 (UA)
IQ48 (BY)
Mauzer (BY)
METANOIA (PL)
Krama (BY)
ULIS (BY)
Neuro Dubel (BY)
Habakuk (PL)
Тартак (UA)
ТГ
угару - up
|
|
|
© Менск 2003-2008 Тузін Гітоў 
Пры выкарыстаньні тэкстаў абавязковая спасылка на "Тузін Гітоў" http://music.fromby.net. Выкарыстаньне файлаў магчымае толькі з папярэдняга дазволу рэдакцыі. 
|