 |  |
чырвона-банэрная рэкляма:
“Тузін выдатнікаў” ад Каці Пытлевай
| 06.07.2006 | Слушны музычны партал “Тузін Гітоў” падводзіць вынікі сэзону 2006. Па традыцыі, арганізоўваецца вялікі ВЫНІКОВЫ ТУР, у якім возьмуць удзел тыя песьні, што ўдзельнічалі ў гіт-парадзе цягам музычнага году і якія будуць абраныя экспэртнай радай “Тузіна Гітоў”. Але ж галоўнае адрозьненьне сёлетняга выніковага туру ад мінулагодняга будзе ў тым, што наведнікі будуць галасаваць не ЗА свае ўлюбёныя песьні, а СУПРАЦЬ тых, якія ім найменш падабаюцца. Кожны экспэрт абірае свой тузін песьняў, зь ліку ўдзелькаў сэзону.
Выбар галоўных беларускіх гітоў ад "Першага музычнага канала" ў асобе Каці Пытлевай.
Tav.Mauzer і Сьвета Сугака, Беларусь будзе вольнай.Пранізьлівая песьня, якая папросту ня можа не зачапіць кожнага патрыёта з пачуцьцямі, у незалежнасьці ад музычных упадабаньняў. Такая ж цяжкая эмацыйна, як і кожная барацьба. Чапляе да мурашоў па скуры, зусім як у жыцьці.
Айша, Зь вераю.
Добры тэкст і цікавы вакал у прыгожай музычнай абгортцы. Вельмі цешыць, што лёгкасьць і паветранасьць песьні, у адрозьненьні ад іншых кампазыцый сэзону ў дадзеным выпадку не папсавалі залішняй брутальнасьцю і перанасычэньнем гітарных рыфаў. Прыемная кампазыцыя.
Грышко Валік, На далонях вясны.
Што радуе, якім быў Грышко, такім і застаўся. Ні да нікога не падобны, ні на нікога не раўняецца - самадастатковы, самабытны выканаўца. Добрая песьня: бадзёрая і сонечная.
Вайцюшкевіч Зьміцер, Дарога.
Супакойлівая ахутваючая музыка; пранікнёны тэкст, што чапляе самыя глыбокія струны душы. Прыгожа ва ўсіх адносінах. Хочацца проста сказаць "дзякуй!" Тодару за тое, што ён робіць, і як заўжды робіць добра.
Палац, Прыляцела ластаўка.
Заўжды сымпатызавала гэтаму калектыву. Падкупляе спрадвечна народныя матывы, што ні кажы. Нічога залішняга, нічога надуманнага - гарманічная кампазыцыя ва ўсіх адносінах. Прыемна яшчэ раз зьвярнуцца да каранёў у такой сучаснай форме, якая, да слова, зусім іх не псуе.
Indiga, Заенька.
Улюбілася ў гэтую кампазыцыю зь першага праслухоўваньня, таму і ў свой Тузін уключыла не вагаючыся ні сэкунды. Чудоўны дуэт і выдатная песьня, якую хочацца слухаць ізноў і ізноў. Дзесяць балаў зь дзесяці.
Dali, Грай, гармон.
Завадныя "Далі", як заўжды далі чаду! Вельмі цікавая музыка плюс выдатныя тэкставыя хады. Рэдкі прыклад, калі якасьць і маладосьць спалучаюцца ў адным калектыве.
Яр, Салдацкая (рэмікс).
Цікавае спалучэньне трып-хоп матываў з народнымі напевамі. Незвычайны твор, але ад гэтага ня менш цікавы. Сапраўдная знаходка для мяне асабіста ў сьпісе прэтэндэнтаў.
Imperator, Уздымайце запальніцы.
Выдатная канкурэнцыя тамтэйшым “Кастам” ды Эмінемам – сваё, блізкае, насутнае і якаснае. Закранула зь першых нотаў – вытрымана ў стыле, але ў той жа час ёсьць і сваё, характэрнае гучаньне. Ажно хочацца працытаваць: “Калі не яны, то хто?”.
IQ48, Сьвятло ў цемры.
Люблю гэты калектыў даўно, гэта песьня не вынятак. Неапісальна выдатнае спалучэньне музычнасьці са зладжанасьцю рэчытатыва – сапраўдная рэдкасьць. Асобная тэма – саксафон – ажно дух захоплівае.
Несьцярэнка і White night blues, Знаю столькі пяшчотаў.
Ну куды ж без клясікі – нікуды. Дыхтоўны, прыемны блюз у лепшых традыцыях каштоўны і запатрабаваны заўжды. Выдатная кампазыцыя.
UltraВожык, Фабрыка сноў.
Па шчырасьці, у першую чаргу крануў незвычайны і надта цікавы вакал, а ўжо потым зьвярнула ўвагу на саму песьню. Добры калектыў з арыгінальным музычным падыходам, незвычайныя спалучэньні зьдзіўляюць і захопліваюць. Выдатна.
Каця Пытлева для "Тузіна Гітоў"
Фота: Wiecier Mechaniczny
угару - up
|
|
|
© Менск 2003-2008 Тузін Гітоў 
Пры выкарыстаньні тэкстаў абавязковая спасылка на "Тузін Гітоў" http://music.fromby.net. Выкарыстаньне файлаў магчымае толькі з папярэдняга дазволу рэдакцыі. 
|