 |  |
чырвона-банэрная рэкляма:
Tav.Mauzer - Радасьць
| 22.01.2007 | Апошні дыск мінулага году. Альбом, які чакалі ня менш за новыя плыткі ад грандаў беларускага року, хоць гэта і дэбютнік ад магілёўскага гурта. Магчыма таму і завецца ён - “Радасьць”. Хоць па настроі яго цяжка назваць такім. “Маўзэр” вытрымаў пасьля тае перамогі немалую паўзу – музыкі падсабралі яшчэ прызоў (ляўрэатства на “Рок-кола”, “Дэбют году” на “Рок-Каранацыі”) і забясьпечылі тым самым гэтаму дыску неслабы перадпрамоўшн.
Альбом напраўду выйшаў моцны – насычаны гітарны “мясны” гук перамяжоўваюцца з электронікай, як таго вымагае сёньняшняя музычная мода. Тэксты – таксама на патрэбу часу (“Будзь тупым”, “Беларусь будзе вольнай”, “Ахвярую Беларусі”). “Маўзэры” знаходзяцца ў кантэксьце (прынамсі, беларускім). Пра такіх кажуць – “іх творчасьць сугучна з нашым часам”. Магілёўцы выконваюць музыку вялікіх фэстывальных пляцовак у краіне, дзе магчымыя збольшага толькі невялікія канцэртнікі. Дарэчы, для камэрных выступаў будзе пасаваць ці не галоўны гіт альбому – “Калыханка”. Пранізьлівая, абсалютная нехарактэрная ні для альбому, ні для творчасьці гуртоў гэтай музычнай плыні, у якой з інструмэнтаў гучаць адно толькі скрыпка ды акустычная гітара. Ужо вядомыя гіты “маўзэраў” тут набылі іншае гучаньне, хоць падаецца, што “Ахвярую Беларусі” у перазапісу нешта згубіла – ранейшая вэрсія хоць была з рэжачым вуха “воздухам”, гучала больш пранікнёна. “Радасьць” слухаецца адным разам безь цяжкасьцяў, а з кожным іншым праслухоўваньнем у гэтых рыках, енках ды ўсхліпах Янкі Маўзэра заўважаеш усё болей сэнсаў. Для ўсіх тых, хто трымае руку на пульсу беларускай незалежнай музыкі.Tav.Mauzer - Радасьць, БМА-груп, 2006
Сяргей Будкін, "Тузін Гітоў", для nn.by
угару - up
|
|
|
© Менск 2003-2008 Тузін Гітоў 
Пры выкарыстаньні тэкстаў абавязковая спасылка на "Тузін Гітоў" http://music.fromby.net. Выкарыстаньне файлаў магчымае толькі з папярэдняга дазволу рэдакцыі. 
|