Тузін Гітоў. Basowiszcza 2007

Хто выступіць на "Басовішчы"

25.06.2007.
Арганізатары фэставаля “Басовішча-2007” вызначылі яго праграму. Найперш дасьведчаным прыхільнікам фэсту кідаецца ў вочы тое, што сёлета ён пройдзе ў тры дні, а ня ў два, як гэта было раней. З 19-га па 21-га ліпеня на сцэне ва ўрочышчы Борэк выступяць каля 30 гуртоў, сярод якіх калектывы зь Беларусі, Польшчы, Украіны і Літвы.

“Басовішча” пройдзе ў тры дні!

14.06.2007.
Адна з галоўны разынак сёлетняга “Басовішча”, якая адрозьніць яго ад папярэдніх фэстаў, – у 2007 годзе яно будзе цягнуцца тры дні. Ад чацьвера (19 ліпеня) да суботы (21 ліпеня) наведнікі “Басовішча” змогуць слухаць музыку, піць піва і адпачываць. “Мы даўно ведалі, што фэстывальных дзён будзе болей, але не было 100% пэўнасьці, таму паведаміць пра гэта вырашылі толькі цяпер”, - кажа старшыня БАСу Радэк Дамброўскі.

“Басовішча”: па-за конкурсам едзе Lilith

14.06.2007.
На “Тузіне Гітоў” скончылася інтэрнэт-галасаваньне, пад час якога наведнікі сайту абіралі аднаго ўдзельніка конкурса “Басовішча-2007”. Пераможцам стаў гурт Lilith. За тыдзень галасаваньня ён набраў 791 голас. Менавітая гэтая каманда без удзелу ў канцэрце “Адборышча” атрымала права ўзяць удзел у конкурснай частцы “Басовішча”. Астатніх ўдзельнікаў абярэ журы пад час адборачных канцэртаў.

Гурт Wanted! ня зможа выступіць на “Адборышчы”

09.06.2007.
Ужо другі год запар гурт Wanted! праходзіць у фінальную частку “Адборышча”, але ня можа ўзяць удзел у адборачным канцэрце. Сёлета прычынай адмовы гурта ад жывога выступу сталася сьмерць бабулі саліста калектыва. У размове з арганізатарамі Kramson (так завуць саліста Wanted!) паведаміў, што 30-ці дзённая жалоба ў яго скончыцца толькі 4 ліпеня. “Да гэтага часу ў маім жыцьці ня можа быць ніякай музыкі”, - сказаў Kramson. Замест гурта Wanted! удзел у канцэрце “Адборышча-2007” возьме гурт Ann Core, менавіта гэтая каманда заняла 21-е месца паводле абагуленага рэйтынгу журы.

Сябры журы пра першы этап “Адборышча”

08.06.2007.
Пасьля абвяшчэньня канчатковага сьпісу гуртоў, якія прымуць удзел у “Адборышчы-2007” сябры журы раскрываюць свае крытэры адбору й дзеляцца думкамі наконт выніковай дваццаткі. “Асабіста я магу назваць 10 гуртоў, - кажа прадстаўнік слушнага музычнага інтэрнэт-парталу “Тузін Гітоў” RWD, - за якія я дакладна ня буду галасаваць у другім туры ні пры якіх абставінах!” “Па-часныку”, - прызнаецца галоўны рэдактар “Музыкальнай Газэты” Алег Клімаў, – з 53-х падаліся любапытнымі штук 10 гуртоў, астатнія – нацягваў да патрэбнай 20-кі.” Тое, як галасаваў кожны зь сябраў журы на першым этапе адбору дэма-запісаў будзе абвешчана падчас падвядзеньня канчатковых вынікаў “Адборышча”.

Вызначаны ўдзельнікі “Адборышча”

06.06.2007.
Сябры журы абралі ўдзельнікаў адборачнага туру фэстывалю “Басовішча-2007”. З 53 прэтэндэнтаў кожны з экспэртаў назваў 20, разьмеркаваўшы месцы ад 1-га да 20-га. Шляхам падліку балаў і былі вызначаны канкурсанты. Усе названыя гурты маюць узяць удзел у канцэрце, які пройдзе 15-16 чэрвеня ў Менску. З удзельнікаў “Адборышча” і будуць абраныя 9 камандаў, што сыграюць на “Басовішчы” і пазмагаюцца за прызы фэстывалю.

Кожны пераможца “Адборышча” зможа бясплатна запісаць песьні на студыі “Осмос”

06.06.2007.
Акрамя права ўзяць удзел у конкурсе “Басовішча 2007” кожны гурт, які трапіць у дзясятку лепшых па выніках “Адборышча” атрымае магчымасьць бясплатна запісаць адну сваю песьню на студыі “Осмос”. Пазьней кампіляцыя з кампазыцыяў усіх гуртоў будзе выдадзеная асобным дыскам. Дарэчы, днямі сьвет пабачыць CD "Басовішча'17" зь песьнямі пераможцаў “Адборышча 2006”.

Конкурс на “Басовішча” – 5,3 гурты на месца. Журы пачало выбіраць удзельнікаў “Адборышча”.

04.06.2007.
Сёлета да ўдзелу ў конкурсе “Басовішча” імкнецца рэкордная колькасьць маладых гуртоў. Аргкамітэт зацьвердзіў заяўкі ад 53 калектываў. Беларускае журы ўжо пачало выбар тых 20 гуртоў, якія пройдуць у наступнае кола – атрымаюць магчымасьць выступіць на “Адборышчы”. Толькі 10 зь іх паедуць на “Басовішча”. Пры тым адзін калектыў абяруць наведнікі “Тузіна Гітоў”.

У сёлетняга “Басовішча” зьявіўся лягатып!

11.05.2007.
Увечары 11 траўня “Беларускае аб'яднаньне студэнтаў” зацьвердзіла новы лягатып фэстывалю “Басовішча”. З усіх дасланых на конкурс варыянтаў быў абраны той, які зрабіў вядомы паэт і дызайнэр Міхал Анемпадыстаў.
У эксклюзыўным інтэрвію для “Тузіна Гітоў” старшыня “БАСу” Радаслаў Дамброўскі тлумачыць свой выбар, а Міхал Анемпадыстаў распавядае пра сэнс, які нясе новы лягатып “Басовішча”.

"Басовішча": акалічнасьці адбору й фэсту

08.05.2007.
Распачалася падрыхтоўка да правядзеньня XIII фэстываля музыкі маладой Беларусі “Басовішча 2007”. Мерапрыемства мае адбыцца 20-21 ліпеня ў Польшчы каля мястэчка Гарадок, у 14-ці кілямэтрах ад беларускай мяжы. Традыцыйна, у межах фэсту пройдзе конкурс маладых гуртоў. Збор заявак ад прэтэндэнтаў ужо распачаўся і працягнецца да 28 траўня. Цяпер арганізатары актыўна занятыя зборам конкурсных заявак, фармаваньнем журы й правядзеньнем “Адборышча 2007” – канцэрта, на якім будуць вызначаныя ўдзельнікі конкурсу на “Басовішчы”. Але паралельна з тым ідзе праца па арганізацыі самаго фэсту.

Конкурс “Басовішча 2007”: збор заявак стартуе ў панядзелак

04.05.2007.
У панядзелак 7 траўня пачынаецца збор заявак ад гуртоў, якія хочуць узяць удзел у конкурсе “Басовішча 2007”. Такое рашэньне прыняў аргкамітэт адборачнага туру “Басовішча”. Сёлета каардынаваць яго будзе сябра рэдакцыі “Тузіна Гітоў” Аляксей Мінчонак. Па бліжэйшым часе пачнецца фарміраваньне журы адборачнага туру, а таксама падрыхтоўка да “Адборышча” – канцэрту, на якім будуць вызначаныя ўдзельнікі конкурснай часткі “Басовішча”. Найперш паведамляем правілы падачы заявак на удзел у конкурсе.

<<<
назад да галоўнай старонкі разьдзела Basowiszcza

угару - up