Гіт-парад Тузіна Гітоў. Слава Корань пра вынікі 8-га (42) туру

Пра краіну рамесьнікаў

| 30.12.2005 |

Слава Корань

Вячаслаў Корань
Нарадзіўся 16.12.1955. У рок-музыцы з 1978 году. Граў у групах “Ліфт”, “Студыя 7”, “Бонда” (1984-1988). У 1988 годзе сышоў з “Бонды” і ўтварыў групу “Ўліс”, у якой выступаў у якасьці аўтара музыкі і гітарыста. З 1996 году – вакаліст, гітарыст і аўтар музыкі і большасьці тэкстаў групы “ULIS”.

Зусім нядаўна я ізноў вырашыў праслухаць музыку, якая была папулярная на Захадзе ў 1980-2000 гадах. Праслухаў дзесяткі складанак і сотню альбомаў. Ня буду апавядаць, які энэргэтычны зарад я атрымаў, ня кажучы пра тое, наколькі шмат прафэсыйна сыгранага і прафэсыйна запісанага матэрыялу я пачуў. Як выявілася, я амаль забыўся, што музыка, якая зроблена якасна, у якой, да ўсяго, прысутнічае энэргетыка ці, калі жадаеце, эмоцыя, імкненьне, душа, існавала раней ды існуе і цяпер. Хаця наша тэлевізія і FM амаль запэўнілі мяне ў тым, што анічога не засталося, а можа нат і не існуе.

Мая ангельская мова пакідае жадаць лепшага, ня кажучы ўжо пра францускую, італьянскую ці нямецкую. Але, як правіла, ня трэба ведаць пра што пяецца ў песьні, каб зразумець, што песьня табе да спадобы. Гэта адбываецца па-за межамі разуменьня і асэнсаваньня. Гэта адбываецца на ўзроўні чалавечай душы, а мова душы для ўсіх аднолькавая.

Але цяпер пра галоўнае, і я маю спадзеў, што ўсе ўцямілі, дзеля чаго быў такі даўгі ўступ.

У прынцыпе, музыка на “Тузіне Гітоў” зьяўляецца адлюстраваньнем таго, што адбываецца на музычным “фронце” ў нашай краіне. Некаторыя выканаўцы, падобна, усё ж далі веры TV і FM прапагандзе ды вырашылі, што яны здольныя “пячы” свае песьні як булкі на хлебазаводзе ці балванкі на заводзе мэталічных канструкцый. Аналёгій можна прывесьці мноства, але ня ў іх справа. Форму гэтыя выканаўцы паставілі па-над зьместам, прафэсыяналізм – па-над душой, халоднасьць – па-над эмоцыяй. Яны канструююць музыку і тэксты да яе, забываючы пра натхненьне і пра тое, што канструяваньне прыводзіць да рамесьніцтва і можа падабацца толькі рамесьніку. Натуральна, я разумею, што мы жывем у краіне рамесьнікаў, а напісаньне такіх “твораў” – спроба спадабацца большасьці слухачоў і зарабіць грошы. Магчыма, вы ўсё ж такі не даацэньваеце тых, для каго пішаце песьні? Іншыя, з прычыны сваёй маладосьці і, суадносна, запалу, які на эмацыйным узроўні можа замяніць энэргетыку, намагаюцца “працаваць” у болей прасунутым, моладзевым жанры. Але жаданьне падабацца ўсім робіць сваю чорную справу і пераўтварае, да прыкладу, панк у поп.

Ёсьць і такія, якія маюць патэнцыял, энэргетыку і някепскія прафэсыйныя здольнасьці, але з прычыны сваёй зараньняй “зорнасьці” памыляюцца кампазыцыйна – наігрываюць куды болей, чым таго вымагае матэрыял. У выніку чаго ў сярэдзіне песьні становіцца сумна.

Некаторыя згубіліся ў наборах сэмплаў і камп’ютэрных гуках і прыніжаюць жывое ўспрыняцьце свайго матэрыялу спэцэфэктамі з фільмаў “Зорныя войны” ці “Ўладар пярсьцёнкаў”. А нехта дык наогул замяняе жывое выкананьне на камп’ютэр, відаць палічыўшы, што ўменьне граць неабавязкова.

Ёсьць выканаўцы, якія граюць наўпростава, намагаючы замяніць энэргетыку сэнсавым зьместам тэкста. Але чамусьці не “запальваюць”. Можа ім варта падлучыць да “вытворчасьці” натхненьне і душу, і меней зьвяртаць увагу на форму, тым больш, што гэтая форма надта ўжо аднастайная.

Нарэшце, ёсьць і такія, хто займаецца пошукам формы з самага пачатку свайго “твора” і да яго канца так яе і знаходзіць. На пошукі формы выдаткоўваюцца ўсе высілкі, і тут ужо не да энэргетыкі, ня кажучы ўжо пра выканаўчае майстэрства.

І ўсё ж, вобмаль, але ёсьць такія выканаўцы, у творчасьці якіх прысутнічае найлепшае за ўсіх спалучэньне формы, зьместу, эмоцыі, энэргетыкі, выканаўчага майстэрства, і менавіта яны, на мой погляд, мусяць займаць верхнія радкі гіт-парадаў. Да жалю, галасаваньне ў гіт-парадах у краіне рамесьнікаў таксама зводзіцца да рамесьніцтва, і таму прадказаць яго немагчыма. Сыходзячы з гэтага я пішу ў той момант, калі тур гіт-параду не фінішаваў. Ну, а хто ёсьць хто ў маіх назіраньнях – здагадайцеся самі.

І яшчэ... Так і чую ў адказ: “Сам дурань”.

Корань Слава, для “Тузіна Гітоў”

усе матэрыялы гэтага туру

рэкляма. чырвоная й банэрная:

рэкляма. чырвоная й банэрная:

угару - up

галоўная
музычныя навіны
гіт-парад
mp3
рэцэнзіі
заля славы
афіша
форум
гасьцёўня
навіны сайту
рэдакцыя
партнэры й спасылкі

мы рэклямуем:

мы рэклямуем:

Пры выкарыстаньні тэкстаў абавязковая спасылка на
"Тузін гітоў" http://music.fromby.net.

Выкарыстаньне файлаў магчымае толькі з папярэдняга дазволу рэдакцыі.