Гіт-парад Тузіна Гітоў. Жывыя “Глюкі”

Жывыя “Глюкі”

Песьня “Ападкі” магілёўскай каманды “Глюкі” – пераможца 6-га тура на “Тузіне Гітоў”. Сваімі рэфлексіямі з нагоды перамогі дзеляцца лідэр групы Аляксей Паронкін і дырэктар Віталь Шум. “Менск існуе аўтаномна. У сталіцах жывое не квітнее. Менчукам няма пра што сьпяваць”.

Навічок 6-га тура на “Тузіне Гітоў” - песьня “Ападкі” магілёўскай каманды “Глюкі” – досыць нечакана шмат для каго адразу ж узбралася на першую прыступку, дзе і пратрымалася два тыдні. Вакаліст групы Аляксей Паронкін кажа, што яны даўно мелі жаданьне ўзяць удзел у “Тузіне Гітоў”, але не былі належным чынам падрыхтаваныя. “Калі мы запісалі свой першы альбом “Humanoid”, сталі адчуваць сябе болей упэўнена”, - кажа музыка. Прэзэнтацыя альбому адбудзецца 9 сьнежня ў магілёўскім клюбе “Joker”. Увойдзе ў дыск і адзін з галоўных гітоў групы, пераможца 6-га тура – песьня “Ападкі”. А.Паронкін усьцешаны перамогай на ТГ: “Магчыма за нас галасавалі, бо мы граем гэткі модны ў сьвеце і занядбаны ў нашай краіне каліфарнійскі панк”, - разважае ён.

Дырэктар групы Віталь Шум зьвяртае ўвагу, што рэгіянальныя каманды маюць у “Тузіне Гітоў” куды большы посьпех. “Лічу правінцыйныя групы – лепшымі. Даўняя завядзёнка: жыцьцё віруе ў сталіцы, а духоўнасьць буяе ў правінцыі. Толькі ня ў той правінцыі, дзе тры крывыя хаты, і нават не ў райцэнтрах, дзе часьцяком узровень індывідуальнай культуры не дазваляе музыкам граць нешта акрамя дубовага панка ці мэтала. Абласныя гарады – вось залатая сярэдзіна”.

Што да сталіцы, то Шум мае такое меркаваньне: “Сталічныя групы часьцяком маюць усё – адданасьць стылю, традыцыям, музычны прафэсыяналізм, але ня маюць той іскрынкі, якая здольная запаліць. Няма духоўнасьці, актуальнасьці. Ім няма пра што сьпяваць. Сапраўднае жыцьцё, рэальная праблематыка сучаснасьці маюць месца недзе ў баку ад цэнтра цывілізацыі. Само паветра ў сталіцах спрыяе хіба толькі нараджэньню зьмярцвелага ўжо эстэцтва”.

На меркаваньне Шума, у сталіцы жывое аніяк ня можа заквітнець: “Масква хоць паглынае пэрыфэрыйныя таленты і пасыянарыі, раскручвае іх і выдае за свае, а Менск існуе аўтаномна”. Ні Шум, ні Паронкін не сумняваліся ў перамозе “Ападкаў”, хоць гэта была першая спробы выйсьці за межы свайго роднага гораду, няхай і ў віртуальную прастору.

Тое, што маюць “Глюкі” – гэта ўпэўненасьць у сваіх сілах. “Большасьць менскіх музыкаў – “вядомых і зорных” – не знайшлі бы сябе ў рэгіёнах, хіба ў дарагіх кабаках, а “Глюкі” трывала стаяць на рок-сцэне”.

Пры канцы нашай размовы і Аляксей, і Віталь дзякуюць усім, хто галасаваў за “Ападкі” і яшчэ раз запрашаюць сваіх прыхільнікаў на прэзэнтацыю свайго дэбютнага альбому 9-га сьнежня.

Сяргей Будкін, "Тузін Гітоў"
02.12.2005

усе матэрыялы гэтага туру

рэкляма. чырвоная й банэрная:

рэкляма. чырвоная й банэрная:

угару - up

галоўная
музычныя навіны
гіт-парад
mp3
рэцэнзіі
заля славы
афіша
форум
гасьцёўня
навіны сайту
рэдакцыя
партнэры й спасылкі

мы рэклямуем:

мы рэклямуем:

Пры выкарыстаньні тэкстаў абавязковая спасылка на
"Тузін гітоў" http://music.fromby.net.

Выкарыстаньне файлаў магчымае толькі з папярэдняга дазволу рэдакцыі.