Сёлета айчыннай рок-легендзе групе “ULIS” будзе 15 год: за гэты час гурт выдаў дзьве кружэлкі і з дзесятак альбомаў, пайграў у лепшых канцэртных залях Эўропы, зьмяніў некалькі вакалістаў, падавалася, што распаўся, але выжыў дзякуючы намаганьням бясьсменнага гітарыста каманды Славы Кораня, які вырашыў засьпяваць сам пасьля сыходу чарговага вакаліста.
Цікава, што ў Кораня сёлета і асобны юбілей – 30 год у рок-н-роле. Гэтыя дзьве падзеі стануцца нагодай для вялікага сольнага канцэрта “Улісу”, што мяркуецца правесьці ў кастрычніку. Мажліва, што ў ім возьмуць удзел былыя ўдзельнікі каманды. Слава Корань кажа, што перамоў на гэты конт з экс-улісаўцамі яшчэ не вяліся. Што да ранейшых вакалістаў “Улісу”, то Корань не мае зь ім ніякага кантакту: “Ні з Патрэям, ні з Тумашовым мы даўно не бачыліся, усе кантакты зь імі згубіліся”. Андрэй Патрэй, голас якога гучыць у песьнях з легендарных альбомаў “Чужаніца”, “Краіна доўгай белай хмары”, жыве пад Воршай. Некалькі год таму яго адшукаў журналіст “Радыё Свабода” Зьміцер Бартосік у мястэчку Барань. Былая рок-зорка сталася праваслаўным вернікам. Што да вяртаньня на сцэну, то Патрэй адказаў, што такое мажліва “еслi Господу будет угодно i жыв буду”. Дзе цяпер Алег Тумашоў (сьпяваў у альбоме “Танцы на даху”) – невядома. “Апошні раз ён мне тэлефанаваў з год таму”, - кажа Корань.
Тым часам БМА-груп занялася падрыхтоўкай СD бокс-сэта з легендарнымі альбомамі гурта (першыя альбомы існуюць у касэтным і “элпэшным” варыянтах). У выданьне ўвойдуць поўныя вэрсіі альбомаў “Чужаніца”, “Краіна доўгай белай хмары” і “Танцы на даху” з рарытэтнымі трэкамі “Мы прыйдзем сюды”, “Лунай, пан Руст”, “Цягнік на Нясьвіж”, таксама вядзецца пошук песьні “Будапешт, Прага, Кабул”. Бма-груп зьвяртаецца да прыхільнікаў групы, у якіх маглі захавацца канцэртныя запісы, відыё і аўдыё матырыялы “Улісу”.
Сяргей Будкін

Крама музычных інструмэнтаў “MUZZONE” вырашыла заняцца пошукам музычных талентаў.
У гэтым, у прынцыпе, і ёсьць галоўнае адрозьненьне ад суседскай “Фабрыкі зорак”. Па словам арганізатараў конкурсу, магчымасьць выявіць сваю таленавітасьць дадзена кожнаму, хто адчувае ў сабе сілы.
Арганізуецца асобны конкурс для гітарыстаў, басістаў, клявішнікаў, бубначоў, вакалістаў, не забытыя таксама аўтары мэлёдый, тэкстаў і аранжыроўшчыкі. Конкурс пройдзе ў тры этапы і працягнецца ажно да канца году. У студзені арганізатары абяцаюць выдаць дыск з кампазыцыямі лепшых, зьняць кліп і распачаць раскрутку новых зорак.
Журы ачольваюць Піт Паўлаў, Кірыл Шэвандо і Макс Івашын. “Тузін гітоў” будзе сачыць за падзеямі конкурсу “MUZZONE драйв”. Першы этап распчнецца ўжо 11 чэрвеня, калі адбудзецца праслухоўваньне ўсіх жадаючых гітарыстаў. Падрабязная інфармацыя і ўмовы конкурсу гл. на www.muzzone.by.
Сяргей Будкін